Баянауыл ауданы әкімдігі мен білім беру бөлімінің қолдауымен Баянауыл ауданы Жаяу Мұса атындағы балалар өнер мектебі 2017 жылғы 11-12 мамырда  музыка және  өнер мектептерінің  жас домбырашылары арасында Алаш партиясының 100-жылдығына орай «Күй-Құдірет» атты  І-республикалық конкурсын ұйымдастырды.

Сайыс жас аралығы  категориясы бойынша,үш бағытта өткізілді:   кіші жас санат категориясы 10 жасқа дейін; орта жас санат категориясы  11-13 жас аралығы, жоғары санат категориясына  14-17 жас аралығындағы жасөспірімдер.

Сайысқа қатысуға еліміздің түкпір-түкпірінен  60-тан аса   дарынды жастар келді. Сайыстың негізгі мақсаты – жас дарындыларды  анықтау, домбырада ойнау шеберліктерін шыңдай түсу.

Әділ-қазы мүшелерінің төрайымы болып Ұлытау тобының мүшесі – Ержан Әлімбетов , әділ –қазы мүшелері Қазақ  ұлттық  өнер академиясының ұстазы – Қайрат Айтбаев , А.Жұбанов атындағы дарынды балаларға арналған мектеп интернат оқытушысы – Нүркен Әшіров  және Баянауыл Жаяу Мұса атындағы өнер мектебінің ұстазы  – Р.Нұрғалиев сынды зиялы  азаматтар тағайындалды.

Қатысушылардан  сайыс  ережесі  бойынша  берілген  бес күйді  орындау талап етілді.  Олар Дина Нұрпейісованың «Сегізінші март» , Қыздарбек «Сылқым қыз», Маңғыстау мектебінен Естай «Бөгелек», Мағауия Хамзиннің «Белгісіз солдаты» сияқты  күйлері  еді. Әрине,  іріктелген күйлер жеңіл емес.

Бірақ, сайыс соңында күй құдіретін  жан дүниесімен сезіп, домбыраның құлағында  шебер ойнай алатын  мықтының мықтысы анықталды.

Сайыс қорытындысы бойынша бас жүлде иегері Ж. Кәрменов атындағы балалар музыка мектебінің  оқушысы Хапан Есболға (ШҚО, Абай ауданы) бұйырды.

Үлкен топ арасында  І орынды  Баянауыл өнер мектебі, ІІ орынды  Шығыс Қазақстан облысы және Семей қаласының балалар өнер мектептерінің оқушылары иеленсе,  ІІІ орын  Павлодар ауданы әкімдігі «Балалар өнер мектебі» (Красноармейка ауылы) мен Екібастұз қаласының өнер мектебі қанжығасына байлады.

Жеңімпазымыз Қаппасов Балтабекке арнайы диплом және ақшалай сыйлық табысталды (20 мың теңге).

Байбусунова Толқын Марсқызы дайындаған домбыра сыныбының оқушысы Каппасов Балтабекті құттықтаймыз, өнерің  сайыстарда шыңдала берсін!

Балалар өнер мектебі әкімшілігі

Красноармейка ауылы