Таланттар ашылуда

Павлодар ауданы Балалар музыка мектебі 2016 жылы қайта құрудан өтіп, Балалар өнер мектебі мәртебесін алып, мүмкіндіктерінің аясын кеңейтіп, қосымша сыныптар мен үйірмелер ашылды. Мектебіміздің филиалдары Луганск, Достық, Заря, Шақат, Набережное ауылдарының мектептерінде жұмыс істейді. Олар облыстық, республикалық, халықаралық, сайыстарға қатысып, жақсы нәтиже көрсетуде.
Қараша айында Алматы қаласында «Инженерия, экология және педагогика ғылымдарының халықаралық академиясы» қоғамдық қорының «Біз – Қазақстан болашағымыз» атты ғылыми-практикалық конференциясының І туры өтті.
Бұл ғылыми-практикалық конференцияға декоративті қолданбалы өнер үйірмесінің жетекшісі Ж.С.Оразова Луганск мектебінің 4 «В» оқушысы Ремель Виолеттамен «Радуга» атты жобасымен қатысып, жүлделі І орынды жеңіп алды.
Олардың жұмысы 20 үздік жоба жинағына еніп, алғыс хат және алтын медальмен мараппаталды. Ақпан айында Виолетта өз жобасымен Мәскеуде өтетін халықаралық ғылыми-практикалық конференцияға қатыспақшы. Оған сәттілік тілейміз!
№2 Чернорецк жалпы орта білім беру мектебінің қабырғасында қобыз сыныбы жұмыс істейді. Ұстазы А.Ж.Уюкбаева оқушысы Абай Айданамен Павлодар қаласында өткен IY Республикалық конкурс-фестиваліне қатысып келді. Айдана Ықылас Дүкенұлының «Жезкиік» күйін қобыз аспабында ойнап, сайыс қорытындысы бойынша І дәрежелі дипломмен марапатталды. Ұйымдастырушылар сапалы дайындық үшін ұстазға алғыс хат табыс етті.
Мектеп әкімшілігі шын жүректен Жанна Салимовна мен Айдана Жұмабаевнаны жемісті еңбегі, жақсы нәтижелерімен құттықтап, биіктерден көріне беруіне тілектестігін білдіреді.