Тәуелсіздік – тұғырым
Тәуелсіздік күніне орай Павлодар ауданының Балалар өнер мектебінде ауылдың құрметті азаматтарының шақырылуымен мерекелік концерт ұйымдастырылды.
Мереке барысында тарихымызға көз жүгіртіп, еркіндікті алу жолындағы тар жол, тайғақ кешу оқиғаларынан үзінді бейнебаян көрсетілді. Біздің жас әншілеріміз өз шығармаларын егемендік сыйлаған, ашық аспан аясында өмір сүруге мүмкіндік берген бабаларымызға арнады. Мерекеге орай, мәжіліс залында сурет үйірмесі оқушыларының тақырыптық көрмесі қойылды.
Мерекелік іс-шараға Красноармейка ауыл округі әкімінің міндетін атқарушы Арман Мейрманұлы Кайруллинов, Красноармейка жалпы орта білім беру мектебінің директоры Төлеужан Солтанбекқызы Баизбаева, Шақат жалпы орта білім беру мектебінің директоры Алмагүл Қайдарқызы Искакова, балабақша басшысы Айнұр Сәкенқызы Бойкова, Красноармейка аграрлық-техникалық колледжінің тәрбие ісі меңгерушісі Жұмагүл Алигожина және ата-аналар шақырылды.
Алғашқы құттықтау сөз Арман Мейрманұлы Кайруллиновқа берілді. Өскелең ұрпақты тәрбиелеуде зор үлес қосқан үшін әкім атынан алғыс хаттармен Қуат Таймасов, Светлана Применко, Толқын Байбусунова және Майра Ақылбекова марапатталды.
Айта кететініміз фортепиано сыныбының оқушысы Кораблев Расул, вокал сыныбының оқушысы Ладыган Альбина және де биыл ашылған хор сыныбының оқушылары алғашқы рет сахнада өз өнерлерін көрсетті.
Мереке соңында Балалар өнер мектебінің директоры Әсем Бекенқызы Қаппасова тәуелсіздігіміздің тұғыры биік, халқымыздың еңсесі жоғары, егемендігіміз баянды болсын деп, жиналған қауымға, өнерлі жұлдыздарымызға алғысын білдірді.